Tumhaare liye aur sirf tumhaare liye.......

jo saath mere bahta hai sada...
tum yaad ka aisa dariya ho....
tumhaari hogi apni alag dunia..
par tum meri saari dunia ho.....

tum rooh ho meri gazalon ki....
tum jaan ho meri baton ki....
raushan meri aankhein tumse....
tum neend ho meri raaton ki....

kya hua,jo tum gujra kal ho..
tum waqt ka ek thahra pal ho...
chaand ki ho parchhaai tum....
tum jheel pe utra baadal ho....

tum patton se dhalti shabnam ho....
halki sardi ka mausam ho....
baarish ki pahli boond ho tum....
jo gaati hai hawa,wo sargam ho...

tum ek pyaara sa naam ho....
sukoon bhari ek shaam ho....
mai samajh saka tumko na kabhi....
tum mushkil ho, kabhi aasaan ho.....

na jaane aakhir kya ho tum...
lagti maasoom hayaa ho tum...
jo hogi nahi kabhi poori....
meri aisi ek dua ho tum.......


The other Part.......


ek be-rukhi sada dikhaati ho....
tum kya kya adaa dikhaati ho...
kabhi lagti ho tum mere jaisi....
kabhi khud ko khuda dikhaati ho....

tum jab gussa jhootha karti ho....
thoda sa aur nikharti ho....
karti ho baat to ladti ho.....
na karo to ghut ke marti ho......

Daastaan-e-Zindagi

jitna in aankho ne dekh liya...
utna bahut kam ne dekha hai...
daava nahi ki sab dekh liya...
par bahut kuch humne dekha hai...

rishto ki talvaar bhi dekhi....
ghaav bhi gahre dekhe hain....
maine bhi jeevan dekha hai...
nazdeek se chehre dekhe hain....

apne liye kuch aankho me....
humne bhi hikaarat dekhi hai...
har kadam pe aukaat bataane ki....
logo ki aadat dekhi hai...

baune hote insaan bhi dekhe...
uchi bhi imaarat dekhi hai...
bazaar me hanste log bhi dekhe...
hansi ghar se nadaarad dekhi hai...

kya kahe ki humne jeete jee...
kya kya na quaamat dekhi hai...
kai maasoomo ko marte dekha hai..
phir giddhho ki daawat dekhi hai...

ek ek kar waqt ke haatho....
apno ko chhinte dekha hai....
jo bachche ginte the taare...
unhe paise ginte dekha hai....

nanhe se komal phoolon pe...
chalte khanjar dekhe hain.....
saron ko jhukte dekha hai...
phir chalte patthhar dekhe hain...

jo saath hhai uski kadr nahi...
phone par baat jaruri dekhi hai...
chhoti hoti is dunia me....
badhti dilon ki doori dekhi hai...

jinke din me hote ujle chehre..
humne unki raat bhi dekhi hai...
hume jo jeene ka dhang sikhhate hain....
humne unki jaat bhi dekhi hai...

sadko pe shor-o-gul ke...
humne roj hi manjar dekhe hain...
jahan kisi ki kisi se baat nahi...
aise kitne hi ghar dekhe hain...

tej bhhagte pairo se dab ke...
rishto ko marte dekha hai...
jisne jitne rishto ka khoon kiya...
use utna behtar karte dekha hai...

har shaam kai laasho ko humne...
nikalte daftar se dekha hai....
idhar kuch raato se maine...
khud ko neend me darte dekha hai....

dhamaako ki aawaaz suni....
dhuyein ke baadal thahre dekhe hain...
phir bhi ye shahar nahi rukta....
humne yahan sab goonge-bahre dekhe hain...

rishto ki talvaar bhi dekhi....
ghaav bhi gahre dekhe hain....
maine bhi jeevan dekha hai...
nazdeek se chehre dekhe hain....